Europa League: Arsenal yatsindiye Olympiacos iwayo, Manchester United inganya na Milan AC
Ibitego byo mu minota ya nyuma byatsinzwe na Gabriel na Mohamed Elneny byafashije Arsenal gukura intsinzi mu Bugereki, ihatsindira Olympiacos 3-1 mu mukino ubanza wa 1/8 cya Europa League wabaye ku wa Kane.
Arsenal yasezerewe na Olympiacos muri iri rushanwa mu mwaka ushize w’imikino, yihariye umupira mu minota myinshi y’igice cya mbere ndetse ibona igitego cyatsinzwe na Martin Ødegaard nubwo Olympiacos yakabaye yishyuye ku ikosa ryakozwe na David Luiz.
Ødegaard yahawe umupira ari inyuma y’urubuga rw’amahina ku munota wa 34, atera ishoti riremereye umunyezamu José Sá ananirwa kurisubiza inyuma.
Mbere gato y’uko amakipe yombi ajya kuruhuka, David Luiz yasubije umupira inyuma, ufatwa na Giorgos Masouras wananiwe kuwutera mu izamu ugaca ku ruhande.
Hashize iminota 13 igice cya kabiri gitangiye, Olympiacos yishyuriwe na Youssef El-Arabi ku mupira wasubijwe inyuma na Dani Ceballos, uyu Munya-Maroc ahita awutsindira kure.
Byasabye gutegereza umunota wa 80, Arsenal itsindirwa igitego cya kabiri na Gabriel Magalhães ku mupira yatsinze n’umutwe nyuma yo guhindurwa na Willian.
Nyuma y’iminota itanu, Mohamed Elneny yashimangiye intsinzi y’Abarashi ku ishoti rikomeye yateye riruhukira mu izamu ryari ririnzwe na José Sá.
Gutsinda uyu mukino byongereye Arsenal icyizere cyo kugera muri ¼ cy’iri rushanwa. Umukino wo kwishyura uzabera mu Bwongereza ku wa Kane w’icyumweru gitaha.
Mu yindi mikino yaraye ibaye, Manchester United yanganyirije mu rugo na Milan AC igitego 1-1. Amad Diallo yafunguye amazamu ku gitego cye cya mbere yatsindiye ikipe ye ku munota wa 50 mu gihe Simon Kjaer yishyuriye Milan ku munota wa 90.
Ajax yatsinze Young Boys ibitego 3-0, Dynamo Kyiv itsindwa na Villarreal 2-0, Slavia Prague inganya na Rangers 1-1, naho Granada itsinda Molde ibitego 2-0.
Harry Kane yafashije Tottenham gutsinda Dinamo Zagreb ibitego 2-0 mu gihe AS Roma yanyagiye Shakhtar Donetsk ibitego 3-0.
Ubwanditsi
Brightafrica.rw
