Ikipe y’igihugu ya Kenya izwi ku izina rya “The Morans” yasesekaye i Nairobi ivuye i Yaounde muri Cameroon ahaberaga imikino y’amajonjora ya nyuma y’igikombe cya Afurika cy’ibihugu (FIBA AFROBASKET) kizabera mu Rwanda hagati muri uyu mwaka wa 2021 kuva tariki 24 Kanama-5 Nzeri muri Kigali Arena.
Kenya yari mu itsinda rya kabiri (B) kumwe na Angola, Mozambique na Senegal. Muri iri tsinda rero, Senegal yasoje iriyoboye n’amanota 11 (5-1), Angola iba iya kabiri n’amanota (10 (4-2) mu gihe Kenya yasoje ari iya gatatu n’amanota 8 (4-2) naho Mozambique isoza ari iya kane n’amanota atandatu (1-4).
Ikipe y’igihugu ya Kenya yaherukaga kubona itike mu 1993 ubwo bari bakiriye iri rushanwa. Gusa mbere yaho nabwo bagiye babona iyi tike kuko nko mu 1985 bari i Abidjan muri Cote d’Ivoire basoza ku mwanya wa 12 mbere yo kwitabira iryabereye muri Angola mu 1989 bagasoza ku mwanya wa 11.
Kenya bakirijwe indabo nk’ikimenyetso simusiga cyo kubashimira ubwitange n’urukundo bagaragaje bashaka itike y’igikombe cya Afurika bari bakumbuye nyuma y’imyaka 28.
Iyi kipe itozwa na Liz Mills kandi byamusigiye amateka yo kuba abaye umugore wa mbere ubashije gufasha igihugu cya Afurika kubona itike y’irushanwa Nyafurika ry’ibihugu.
Ibihugu 12 nibyo bimaze kubona itike mu gihe bitakunze ko imikino yo mu itsinda rya gatanu (E) irangira kubera COVID-19 yadukiriye abakinnyi ba Uganda. Muri iri tsinda rya gatanu (E), Misiri niyo yari yamaze kubona itike mu gihe ibihugu birimo; Cape Verde, Morocco na Uganda bataramenya igihe bazasubukurira imikino bari basigaje.
Muri rusange ibihugu byamaze kubona itike ni; Tunisia, DR Congo, Nigeria, South Sudan, Mali, Rwanda (Host), Senegal, Angola, Kenya, Cote d’Ivoire, Cameroon na Misiri.
Ubwanditsi
