Zambia: Abagabo bafunzwe kubera guhamwa no gucura umugambi w’ubupfumu wo kwica Perezida
Ubwanditsi
Urukiko rwo muri Zambia rwakatiye abagabo babiri gufungwa imyaka ibiri kubera kugerageza gukoresha ubupfumu kugira ngo bice Perezida Hakainde Hichilema.
Nkuko tubikesha BBC, Gahuza, Umunya-Zambia Leonard Phiri n’Umunya-Mozambique Jasten Mabulesse Candunde bahamijwe icyo cyaha hashingiwe ku itegeko rihana ubupfumu, nyuma yuko batawe muri yombi mu Kuboza (12) kw’umwaka ushize bafite impigi (inzaratsi), zirimo n’uruvu ruzima.
Mu gusoma umwanzuro w’urukiko, umucamanza Fine Mayambu yagize ati: “Ni igitekerezo [ibintu] nitondeye [mu kuvuga] ko abahamwe n’icyaha batari umwanzi gusa w’umukuru w’igihugu ahubwo bari n’abanzi b’Abanya-Zambia bose.”
Uru rubanza rwakurikiraniwe hafi muri Zambia kuko iyi ni inshuro ya mbere bibayeho ko umuntu aburanishwa ku kugerageza gukoresha ubupfumu kuri perezida.
Perezida wa Zambia Hakainde Hichilema avuga ko atemera ubupfumu
Ubushinjacyaha bwavuze ko Phiri na Candunde bahawe akazi n’uwahoze ari depite wahunze ngo baroge Hichilema.
