Mashami yahamagaye abakinnyi bagomba kwitegura umukino wa Mozambique na Cameroun
Kuri uyu wa Gatandatu taliki 06 Werurwe 2021, umutoza mukuru w’ikipe y’igihugu “Amavubi”, Mashami Vincent yashyize ahagaragara urutonde rw’abakinnyi 31 bagomba gutangira imyitozo bakazatoranywamo abazakina umukino wa Mozambique na Cameroun mu mikino yo gushaka itike ya CAN 2021 izaba muri Mutarama na Gashyantare 2022.
Ikipe y’u Rwanda “Amavubi” izakina na Mozambique i Kigali taliki 24 Werurwe nyuma ikine na Cameroun iwayo taliki 30 Werurwe 2021.
Nk’uko tubikesha ishyirahamwe ry’umupira w’amaguru mu Rwanda “FERWAFA”, biteganyijwe ko ku munsi w’ejo ku Cyumweru taliki 07 Werurwe 2021, abakinnyi n’abatoza bagomba gupimwa COVID-19 nyuma yo kubona ibisubizo bagahita bajya mu mwiherero muri La Palisse Hotel i Nyamata.
Imyitozo igomba gutangira ku wa Mbere taliki 8 Werurwe 2021 aho izajya ibera kuri Sitade ya Kigali ndetse na Sitade Amahoro, inshuro ebyiri ku munsi.
Muri iyi mikino yo gushaka itike ya CAN 2021, mu itsinda F, ikipe y’ u Rwanda iri ku mwanya wa nyuma (4) n’amanota 2 naho Cameroun irayoboye n’amanota 10 igakurikirwa na Mozambique na Cap Vert n’amanota 4.
Mu mikino 4 iheruka ikipe y’u Rwanda yakinnye yatsinzwe na Mozambique ibitego 2-0 itsindwa na Cameroun igitego 1-0 inganya na Cap Vert mu mukino ubanza n’uwo kwishyura 0-0. Amakipe 5 ni yo amaze kubona itike yo kuzakina CAN 2021, aya ni Cameroun izakira irushanwa, Senegal, Algeria, Mali na Tunisia.
Abakinnyi 31 bahamagawe
Mu bakinnyi bahamagawe ntabwo harimo rutahizamu Tuyisenge Jacques wagiriye imvune mu mikino ya CHAN 2020 iheruka kubera muri Cameroun. Hari kandi Bizimana Djihad ukina muri Beveren mu Bubiligi umaze iminsi adahagaze neza ndetse na Niyonzima Ally ukinira Azam FC muri Tanzania wabonye ikarita y’umutuku mu mukino w’umunsi wa 4 wahuje Amavubi na Cap Vert i Kigali.
Abanyezamu: Kwizera Olivier (Rayon Sports), Mvuyekure Emery (Tusker FC, Kenya)
Ndayishimiye Eric (AS Kigali) na Kimenyi Yves (Kiyovu ).
Myugariro: Mutsinzi Ange, Fitina Omborenga, Manzi Thierry, Imanishimwe Emmanuel (APR FC), Bayisenge Emery, Rugirayabo Hassan (AS Kigali), Usengimana Faustin, Rutanga Eric (Police FC), Rwatubyaye Abdul (FK Shkupi, Macedonia) na Nirisarike Salomon (Urartu FC, Armenia).
Hagati: Niyonzima Olivier Seif, Ruboneka Bosco, Manishimwe Djabel (APR FC), Twizeyimana Martin Fabrice (Police FC), Muhadjir Hakizimana (AS Kigali), Ngendahimana Eric (Kiyovu), Mukunzi Yannick (Sandvikens IF, Sweden), Rubanguka Steven (AE Karaiskakis Artas, Greece), Muhire Kevin (Sahama Club, Oman) na Niyonzima Haruna (Young SC, Tanzania).
Rutahizamu: Iradukunda Jean Bertrand (Gasogi United), Nshuti Dominique Savio, Iyabivuze Osée (Police FC), Sugira Ernest (Rayon Sports), Byiringiro Lague, Usengimana Danny (APR FC) na Kagere Meddie (Simba SC).
Ubwanditsi
