Rais Kagame na Rais Diomaye Faye wa Senegal walishiriki katika Car Free Day.
Christopher Karenzi
Rais wa Paul Kagame na Rais wa Bassirou Diomaye Faye wa Senegal, aliyekuwa katika ziara nchini Rwanda, waliungana na wakazi wa jiji la Kigali katika mazoezi ya pamoja ya “Car Free Day”.
Asubuhi ya Jumapili, tarehe 19 Oktoba 2025, wakazi wa maeneo mbalimbali ya Kigali walijitokeza barabarani kushiriki katika mazoezi haya ya wazi yanayofanyika kila mwezi.
Ikulu ya Senegal ilitangaza kuwa Rais Diomaye Faye alipokea mwaliko kutoka kwa serikali ya Rwanda kushiriki pamoja na Rais Kagame katika “Car Free Day”, shughuli inayolenga kuhamasisha afya bora kwa jamii.
Taarifa hiyo ilisema: “Viongozi hawa wawili wa nchi walitembea umbali wa kilomita 5 kama ishara ya kuimarisha afya, ustawi wa jamii na kulinda mazingira.”
Rais Diomaye Faye, ambaye alikuwa anahitimisha ziara yake nchini Rwanda, alituma ujumbe kupitia mitandao yake ya kijamii akieleza kuridhishwa na matokeo ya ziara yake.
Alisema: “Ziara yangu nchini Rwanda imehitimishwa kwa ishara ya umoja na ushirikiano. Namshukuru Rais Kagame, serikali yake, na wananchi wa Rwanda kwa mapokezi mazuri na ukarimu wao.”
“Rwanda ni mfano halisi wa kujenga nchi na kuweka mipango madhubuti ya maendeleo. Tunavutiwa na juhudi hizi na tunaziheshimu. Nchi zetu zinasafiri pamoja katika safari ya ubunifu barani Afrika.”
Car Free Day ni mazoezi ya pamoja yaliyoanzishwa Mei 2016 kwa lengo la kuhamasisha wakazi wa Kigali kufanya mazoezi na kurahisisha ushiriki wa jamii.
Mazoezi haya pia yana lengo la kuzuia magonjwa mbalimbali, ambapo washiriki hupata ushauri na kupimwa bure. Sasa hivi mazoezi haya yanafanyika pia katika mikoa mingine ya Rwanda.
Uhusiano kati ya Rwanda na Senegal umekuwa mzuri kwa miaka mingi. Mwaka 2011, Rwanda ilifungua ubalozi mjini Dakar, hatua iliyowezesha ushirikiano mkubwa zaidi kati ya mataifa haya mawili.
