COVID-19: MINALOC yatangaje amabwiriza agenga imihango y’ubukwe
Nyuma y’uko Inama y’Abaminisitiri yo ku wa 31 Gicurasi 2021 yemeje ko imihango yo gusaba no kwiyakira bijyanye n’ubukwe bisubukurwa ariko bikazajya bikorwa hubahirizwa amabwiriza yo kwirinda icyorezo cya COVID-19, Minisiteri y’Ubutegetsi bw’Igihugu (MINALOC) yatangaje amabwiriza agomba kuzajya yubahirizwa muri iyo mihango.
Mu itangazo ryashyizweho umukono na Minisitiri w’Ubutegetsi bw’Igihugu, Gatabazi Jean Marie Vianney, kuri uyu wa 1 Kamena 2021, yatangaje ingingo zikubiyemo ingamba zizajya zubahirizwa ku bitabira ibi birori.
Havugwamo ko umuhango wo gusezerana imbere y’amategeko cyangwa mu rusengero witabirwa n’abantu 30 gusa. Imihango yo gusaba, gukwa no kwiyakira yabereye muri hoteli cyangwa ubusitani ntigomba kurenza 30% by’ubushobozi bwo kwakira abantu bw’aho bateraniye ariko buri wese akabanza kwerekana ko yipimishije COVID-19 kandi atanduye.
Iri tangazo rikomeza rigira riti: “Iyo imihango ibereye mu rugo hakirwa abantu 30 gusa kandi bagakomeza kubahiriza amabwiriza yose asanzwe yo kwirinda COVID-19; kugira ngo imihango ibere mu rugo bisaba kubimenyesha ubuyobozi bw’umurenge nibura iminsi 5 mbere y’uko umuhango uba kugira ngo bukurikirane ko iyo mihango yubahiriza amabwiriza yo kwirinda COVID-19”.
MINALOC ivuga ko abafite amahoteli n’ubusitani byakira abantu bagomba gukorana na Minisiteri y’Ubuzima ku bijyanye no kugenzura ko abantu bapimwe kandi bafite ibisubizo bigaragaza ko batanduye COVID-19 bitarengeje byibuze iminsi itanu.’’
Minisiteri y’Ubutegetsi bw’Igihugu yasabye inzego z’ibanze n’iz’umutekano gukurikirana ko amabwiriza mashya n’andi asanzwe yo kwirinda COVID-19 yubahirizwa nk’uko yagenwe.
Ubwanditsi
Brightafrica.rw
