Afrobasket 2021: Ikipe y’u Rwanda iri mu itsinda rimwe na Angola
Kuri uyu wa Gatanu tariki 28 Gicurasi 2021 i Kigali muri Serena Hotel habereye tombola y’uko amakipe azahura mu mikino y’Afurika y’ibihugu mu mukino wa Basketball “FIBA Afrobasket Rwanda 2021”.
Muri iri rushanwa rizabera mu Rwanda kuva tariki 24 Kanama kugeza 05 Nzeri 2021, amakipe 14 muri 16 yashyizwe mu matsinda naho amakipe 2 asigaye akaba azamenyekana muri Nyakanga 2021 nyuma y’imikino yo mu itsinda E yasubitswe.
Mu mikino ya nyuma yo gushaka itike yabereye muri Tunizia muri Gashyantare 2021, ikipe ya Uganda nta bwo yakinnye imikino yayo kubera abakinnyi n’abari babaherekeje basanzwemo COVID-19. Uretse ikipe ya Misiri ni yo yabonye itike hanyuma Maroc, Cap Vert na Uganda zikaba zizategereza imikino 3 yari isigaye kugira ngo hamenyekane andi makipe abiri.
Nyuma ya tombola, ikipe y’u Rwanda yisanze mu itsinda A hamwe n’ikipe y’igihugu ya Angola ifite iki gikombe inshuro 11, RDC ndetse n’ikipe izaba iya gatatu mu itsinda E (Maroc, Cap Vert cyangwa Uganda).
Itsinda B ririmo Tunizia, Misiri, Central African Republic na Guinea. Itsinda C ririmo Nigeria, Cote d’Ivoire, Mali na Kenya naho itsinda D rikabamo Senegal, Cameroun,Sudani y’Amajyepfo n’ikipe izaba iya kabiri mu itsinda E (Maroc, Cap Vert cyangwa Uganda).
Imikino y’Afurika iheruka muri 2017 yabereye muri Senegal na Tunizia. Ikipe y’igihugu ya Tunizia ni yo yegukanye igikombe itsinze ku mukino wa nyuma Nigeria amanota 77 kuri 65. Ikipe ya Angola ni yo imaze gutwara iki gikombe inshuro nyinshi (11).
Ubwanditsi : Brightafrica
