APR BBC ikomeje kwitwara neza muri Shampiyona 2024-2025
Shampiyona y’icyiciro cya mbere mu bagabo ku wa Gatatu, tariki 5 Werurwe 2025 yarakomeje hakinwa imikino y’umunsi wa 9, yose yabereye muri Petit Stade i Remera.
Mbere yo gutangira umukino hafashwe umunota wo kwibuka umubyeyi wa Perezida wa APR BBC Richard Murefu.
Umukino wabimburiye indi wahuje ikipe ya APR BBC ifite igikombe cya shampiyona inshuro 2 ziheruka, ikaba yaratsinze Espoir BBC amanota 86-79 nubwo itorohewe n’imvune.
Diarra Aliou
Habura iminota itatu ngo agace ka kabiri k’umukino karangira umukinnyi ukomeye wa APR Diarra Aliou yaje kugira imvune ikomeye ahita asimbuzwa.
Agace ka gatatu n’aka kane APR yakomeje kuza imbere ya Espoir nayo iyirya isata burenge.
Abakinnyi ba APR barimo Ntore, Mukama J.Victor umukinnyi mushyashya witwaye neza muri uyu mukino ndetse na Axel Mpoyo banyuzagamo bagatsinda amanota atatu byazamuye ikipe yegukana itsinzi.
Kuri uyu mukino Ntore Habimana yatsinzemo amanota 20.
Muyindi mikino yabaye REG BBC yatsinze Kepler bigoranye amanota 72-71
Tigers BBC itsinda Azomco ku manota 96-89
Nyuma y’umunsi wa 9 wa Shampiyona, APR BBC iracyayoboye urutonde n’amanota 12 mu mikino 6 imaze gukina, ikurikiwe na REG BBC n’amanota 10 mu mikino 5 imaze gukina, Patriots BBC iri ku mwanya wa 3 n’amanota 9 mu mikino 5, Kepler iri ku mwanya wa 4 n’amanota 8 mu mikino 5 mu gihe Tigers, UGB na Espoir BBC zinganya amanota 7.
Orion iri ku mwanya wa 8 ndetse na AZOMCO iri ku mwanya wa nyuma (9), zombi zinganya amanota 6.
Iyi shampiyona ikaba ikomeza kuri uyu wa Gatanu, tariki 7 Werurwe 2025, ahateganyijwe imikino y’umunsi wa 10, izabera muri BK Arena.
Kuri uyu wa gatanu tariki 07.03.2025 hateganijwe indi mikino ikurikira:
Espoir BBC iracakirana na UGB (17h00), Tigers BBC ihure na Orion (19h00). umukino utegerejwe na benshi ni uri buhuze REG BBC na APR BBC saa moya za nimugoroba (21h00).
Abayoboye abandi mu gutsinda amanota menshi muri shampiyona ya 2025 (Top scorers):
1. Mwanawabene Ampire Fortunat (ESPOIR) 133 PTS
2. DAMARIA Franklin (AZOMCO) 122 PTS
3. Diarra Aliou Fadiala (APR BBC) 106 PTS
4. Mohamed Doumbya (UGB) 104 PTS
5. Chad Bowie Jordan (KEPLER BBC) 104 PTS
6. BOISSY Jean Jacques (REG) 98 PTS
7. Twizeyimana Cyiza Chandelier (KEPLER BBC) 92 PTS
Christopher Karenzi/Brightafrica.rw
