APR BBC yatsinze REG BBC umukino wa gatatu yikurikiranya

Ikipe ya APR BBC yatsinze REG BBC amanota 80-75 mu mukino wa gatatu mu ya nyuma ya kamparamaka wabereye muri BK Arena ku mugoroba wo ku wa Gatatu tariki 6 Nzeri 2023, yiyongera amahirwe igikombe cya Shampiyona y’uyu mwaka.

Ikipe y’ingabo yatangiye neza agace ka mbere ku mukino irusha cyane REG BBC ibifashijwemo n’abakinnyi nka Nshobozwabyosenumukiza Jean Jacques Wilson na Ntore Habimana maze bagatsinda mu manota 24-14.

Mu gace ka kabiri ku mukino ikipe ya REG BBC yaje yashyizemo imbaraga ibifashijwemo na Adonis Filer igerageza kugabanya ikinyuranyo maze itsinda amanota 27-20, muri rusange uduce twombi APR BBC ni yo yagiye kuruhuka ifite amanota 44 kuri 41 ya REG BBC.

Mu gace ka gatatu amakipe yombi yahanganye mu buryo bukomeye REG ishaka kongera amanota gusa APR BBC yakomeje kwihagararaho maze igatsinda ku manota 20-19.

Agace ka kane, ikipe ya APR BBC yakomeje kongera amanota nubwo REG BBC yongeye kuyigora maze irangiza umukino itsinze amanota 80-75.

Amakipe yombi azagaruka mu kibuga kuri uyu Gatanu muri BK Arena hakinwa umukino wa kane, APR BBC iramutse iwutsinze izahita yegukana igikombe cya shampiyona yaherukaga mu mwaka wa 2009.

Mu bagore, REG Women BBC yatsinze APR Women BBC amanota 87-86 mu mukino wa mbere mu ya nyuma ya kamparamaka.

Amakipe yombi aragaruka mu kibuga kuri uyu wa Gatanu bakina umukino wa kabiri mu ya nyuma ya kamparamaka, ikipe izatsinda imikino 4 muri irindwi izahita yegukana igikombe cya shampiyona cy’uyu mwaka mu bagore.

Brightafrica