Impinduka ku matariki y’imikino ya nyuma ya BAL 2023 izabera i Kigali
Irushanwa rihuza amakipe ahagaze neza muri Basketball ya Afurika, Basketball Africa League (BAL) ryahinduriwe amatariki ku mikino ya nyuma izabera muri BK Arena muri Gicurasi 2023.
Imikino ya nyuma muri 1/4 byari biteganyijwe ko izatangira ku Cyumweru, tariki ya 21 Gicurasi, isozwe ku wa 27 Gicurasi 2023.
BAL yatangaje ko iyi mikino izahuriza hamwe amakipe umunani muri Kigali, izatangira ku wa Gatandatu, tariki ya 20 Gicurasi 2023.
Izi mpinduka zakozwe mu gufasha abakunzi ba Basketball kuryoherwa no kureba imikino yose ya ¼ mu mpera z’icyumweru.
Kugeza ubu amakipe ane yamaze kubona itike ya 1/4. Arimo REG (Rwanda Energy Group) BBC ihagarariye u Rwanda, AS Douanes yo muri Sénégal, ABC Fighters yo muri Côte d’Ivoire na Stade Malien yo muri Mali, yahuriye mu Itsinda rya Sahara Conference I Dakar muri Werurwe 2023.
Biteganyijwe ko kuri uyu wa Gatatu, tariki ya 26 Mata, ari bwo Itsinda rya Nile Conference ritangira gukina. Iyi mikino ibera muri Hassan Mostafa Indoor Sports Complex i Cairo mu Misiri, izasozwa ku wa 6 Gicurasi 2023.
Iri tsinda ririmo Al Ahly (Misiri), Cape Town Tigers (Afurika y’Epfo), Petro de Luanda (Angola), City Oilers (Uganda), Ferroviário da Beira (Mozambique) na Seydou Legacy Athlétique Club (Guinea).
Amakipe ane ya mbere ni yo aziyongera ku yakatishije itike muri Sahara Conference, akaba umunani agomba guhurira i Kigali.
Muri iyi mikino igiye kubera mu Misiri, Umusifuzi Mpuzamahanga w’Umunyarwanda, Jean Sauveur Ruhamiriza, ari mu basifuzi 15 bazayiyobora.
Ni ku nshuro ya gatatu, Ruhamiriza agiye gusifura BAL, kuva yagaragara bwa mbere ubwo yatangizwaga mu 2021.
US Monastir yo muri Tunisia ni yo ifite Igikombe cya Basketball Africa League [BAL 2022], yagitwaye itsinze Petro de Luanda yo muri Angola amanota 83-72.
