U Rwanda na Congo bigiye kuganira ku birego byo gufasha Umutwe wa M23
Umuvugizi wa Guverinoma ya Repubulika Iharanira Demokarasi ya Congo, Patrick Muyaya, yatangaje ko bagiye gukoresha inzira za dipolomasi mu kuganira n’u Rwanda ku bibazo bikomeje kuvugwa, birimo ibijyanye n’abantu bafashwe bitwa abasirikare barwo.
Mu ijoro rishyira ku wa 28 Werurwe, muri Teritwari ya Rutshuru hagabwe ibitero byitiriwe Umutwe wa M23, wigaruriye ibice birimo n’Umujyi wa Bunagana uri hafi y’umupaka na Uganda.
Ingabo za Repubulika ya Demokarasi ya Congo zasohoye itangazo zivuga ko abagabye ibitero barimo abasirikare b’u Rwanda, ndetse ko hafashwemo babiri; Adjudant Habyarimana Jean Pierre na Uwajeneza Muhindi John uzwi nka Zaje.
Guverineri w’Intara y’Iburengerazuba, Habitegeko François, yaje gusohora itangazo yamagana ibyavuzwe, ati “Turashaka kwamagana byeruye ibi birego bidafite ishingiro no gushimangira ko RDF nta ruhare na ruto ifite mu bikorwa by’ubushotoranyi muri RDC.”
Mu kiganiro Minisitiri ushinzwe Itumanaho akaba n’Umuvugizi wa Guverinoma ya RDC, Patrick Muyaya, yagiranye na RFI, yabajijwe ku byabaye, asubiza ko atari ubwa mbere M23 iteye, ndetse ko igitero giheruka cyabaye mu Ugushyigo 2021.
Yavuze ko kuba hari abantu bahuza ibi bitero n’u Rwanda wenda bafite ibyo bashingiraho, ariko icyo Guverinoma ya Congo ishyize imbere ari amahoro.
Yakomeje ati “Uyu munsi icyo twibandaho ni uko igihe kigeze ngo twubake umubano wubakiye ku mahoro mu Karere k’Ibiyaga Bigari, ndetse kuva perezida (Tshisekedi) yajya ku butegetsi mwabonye ko ubushake buhari bwo gukorana neza n’abaturanyi bacu.”
Yakomeje ati “Ni ukuvuga ngo hari uburyo bwashyizweho bwo kugenzura ibibazo bihuza imipaka, hari inzira za dipolomasi, biraza gukoreshwa kugira ngo ibi bisobanuke neza. Ni ukuvuga ko ubushake burahari bwo kugira ngo tugere ku mahoro n’iterambere muri aka karere k’ibiyaga bigari.”
Minisitiri Muyaya yanakomoje ku buryo Perezida Félix Tshisekedi na Perezida Paul Kagame baheruka guhurira mu nama muri Jordanie, nk’ubushake bwo kunoza umubano w’ibihugu byombi.
Minisitiri Muyaya yabajijwe niba nyuma yo gutangaza ko bafashe abasirikare b’u Rwanda, bakavuga amazina n’amapeti byabo, hakiri ugushidikanya niba koko ari Abanyarwanda.
Yakomeje ati “Ntabwo nifuza kwinjira muri iyo ngingo, ariko hano icyo tureba ni icy’ingenzi kurusha ibindi, icy’ingenzi ni amahoro.”
Mu gihe ingabo za RDC zivuga ko aba bantu ari bwo bari bafashwe, hari amakuru ko ahubwo bafashwe ku wa 1 Gashyantare 2022, bitandukanye na tariki 28 Werurwe yatangajwe n’Umuvugizi wa Guverineri wa Kivu y’Amajyaruguru, Gen Sylvain Ekenge.
Ubwanditsi brightafrica.rw
