REG yabonye itike y’imikino ya nyuma ya BAL 2022 itsinze US Monastir
Ikipe ya REG BBC ihagarariye u Rwanda mu irushanwa rya Basketball Africa League 2022, yatsinze US Monastir yo muri Tunisia amanota 77-74 biyihesha kubona itike y’imikino ya nyuma izabera i Kigali mu mpera za Gicurasi.
Uyu mukino wabaye ku mugoroba wo ku wa Mbere muri Dakar Arena, wari uwa kane kuri REG BBC iri mu Itsinda rya mbere “Sahara Conference”.
US Monastir yakinnye umukino wa nyuma wa BAL mu mwaka ushize, yari hejuru mu gace ka mbere karangiye itsinze amanota 26-21 mu gihe aka kabiri na ko yagatsinze kuri 16-15 (42-36).
Mu gace ka gatatu, abarimo Nshobozwabyosenumukiza Jean Jacques, Ndizeye Dieudonné na Axel Mpoyo bafashije REG BBC kugaruka mu mukino, igatsinda ku manota 20-13 (56-55) mu gihe umukino warangiye REG BBC iri imbere n’amanota 77-74.
Michael Andre Dixon wa US Monastir yatsinze amanota 23 muri uyu mukino mu gihe Pitchou Kambuy Manga wa REG BBC yatsinze 16.
Gutsinda uyu mukino byatumye REG BBC ya kabiri ubu, yizera gusoreza mu makipe ane ya mbere azakina imikino ya nyuma ya BAL 2022 izabera i Kigali hagati ya tariki ya 21 n’iya 28 Gicurasi.
Iyi kipe ihagarariye u Rwanda, irasoza imikino yayo kuri uyu wa Kabiri aho ikina na Club Ferroviário da Beira yo muri Mozambique guhera saa Moya n’igice.
Undi mukino wabaye ku wa Mbere, warangiye AS Salé yo muri Maroc itsinze SLAC yo muri Guinée amanota 97-81.
