APR VC yegukanye igikombe cy’irushanwa ryo kwibohora 2023
Ikipe ya APR VC mu bagabo yegukanye irushanwa ryo Kwibohora 2023 ryabaga ku nshuro ya mbere mu mukino wa Volleyball.
Ni irushanwa ryabaye mu mpera z’icyumweru gishize ku wa Gatandatu ndetse no ku Cyumweru, rikaba ryarabaga ku nshuro ya mbere.
Ku wa Gatandatu tariki ya 8 Nyakanga 2023 nibwo habaye imikino y’ijonjora maze ku Cyumweru tariki ya 9 Nyakanga 2023 haba 1/2 ndetse n’imikino ya nyuma.
Imikino ya 1/2 ndetse n’imikino ya nyuma ikaba yarabereye muri Kigali Arena guhera saa 11h.
Muri 1/2 mu bagabo, Gisagara VC yahuye na REG VC iheruka gutwara igikombe cyo Kwibuka iyitsindiye ku mukino wa nyuma. Yaje kuyisubira igera ku mukino wa nyuma iyitsinze amaseti 3-1.
Undi mukino wa 1/2, APR VC yageze ku mukino wa nyuma itsinze Police VC amaseti 3-1.
APR VC yaje gutsinda uyu mukino mu buryo bworoshye, yabanje gutsinda amaseti 2, Gisagara itsinda imwe mbere y’uko itsinda iya 3 yayihesheje igikombe (21-25, 22-25, 25-23 na 25-27).
Umwanya wa 3 mu bagabo wegukanywe na REG VC itsinze Police VC.
Ikipe ya mbere yahembwe miliyoni y’amafaranga y’u Rwanda, iya kabiri yahembwe amafaranga ibihumbi 700 mu gihe iya 3 ari ibihumbi 500.
Perezida wa FRVB Ngarambe Raphael ubanza iburyo atanga imidari ku ikipe ya APR VC
Perezida wa FRVB Ngarambe Raphael, mu kiganiro n’abanyamakuru yavuze ko iri rushanwa ryo kwibohora ku nshuro ya 29, rizajya riba buri mwaka . Muri uyu mwaka ni ku nshuro ya mbere ribaye. Perezida Ngarambe yagarutse ku butumire b’ikipe ya Amicale VCy’i Bujumbura i Burundi ikaba yaratumiye amakipe ibinyujije kuri Federation ya FRVB, imikino ikaba izabera i Bujumbura mu mpera z’iki cyumweru ku ya 14.07.2023. Ibi bikaba biri mu rwego rwa gutsura umubano binyuze mu mikino.
Ubwanditsi
